У Беларусі з 2008 года дазваляецца работа студэнцкіх атрадаў у сферы паслуг
20 жніўня, Мінск /Таццяна Паляжай - БЕЛТА/. У Беларусі з 2008 года дазваляецца работа студэнцкіх атрадаў у сферы паслуг. Як паведамілі БЕЛТА у прэс-службе прэзідэнта, кіраўнік дзяржавы 20 жніўня падпісаў адпаведны ўказ нумар 392, які ўносіць дапаўненне і змяненні ва ўказ ад 12 мая 2005 года нумар 222 “Аб некаторых пытаннях арганізацыі дзейнасці студэнцкіх атрадаў”.
Студэнцкія атрады могуць стварацца ў перыяд з 1 мая па 30 верасня для работы ў галіне адукацыі, аховы навакольнага асяроддзя, будаўніцтва, сельскай гаспадаркі. Акрамя гэтага, моладзь можа быць занята ў сферы аказання паслуг: працаваць у складзе прыёмных камісій устаноў адукацыі, праваднікамі чыгуначнага транспарту, выконваць падсобныя работы ў пунктах грамадскага харчавання дзіцячых аздараўленчых лагераў, а таксама па спецыяльнасцях школьных вучэбна-вытворчых камбінатаў.
Для работы будатрадаў дазволена прыцягненне арганізацый прыватнай формы ўласнасці.
Функцыя ўзгаднення рашэнняў аб стварэнні студэнцкіх атрадаў перададзена абласным і Мінскаму гарадскому выканкамам.
Як растлумачылі ў прэс-службе, прынятыя меры створаць дадатковыя магчымасці для вырашэння праблем працаўладкавання і другаснай занятасці моладзі.